جدتي آحلى جده


    صلصة ...تونة....حليب....دقيق....ماء...بيض=مكرونة بشمل والسيناريو واحد

    شاطر
    avatar
    مربطة الجن
    حفيد نشيط
    حفيد نشيط

    عدد المساهمات : 77
    تاريخ التسجيل : 26/05/2010

    صلصة ...تونة....حليب....دقيق....ماء...بيض=مكرونة بشمل والسيناريو واحد

    مُساهمة من طرف مربطة الجن في الإثنين سبتمبر 20, 2010 2:20 am

    الفلسفات النفسية طرب بالنسبة لي <<يعني اللي تخصصه علم نفس يجي عندي وبسمعه مثل مايسمع البزر قصة ام حديجان<<الله من زين المقدمات

    قبل مدة
    الصبح بعد الفطور جلست اتقهوى مع امي ووالتلفزيون ملعلع على بداية ..واللي تنهضم اذا كان فيها العرفي لكن ماتنهضم ابد اذا كان العيادة النسائية ولا تغص فيها بعد لان بصراحة جنسي بهم بثاااارة شوي وامراضهن مدري وش تبي .تحوم التسبد خاصتن اذا كنت توك مفطر ترجع ترجيع رجعي يعني ترجع اشياء مااكلتها .......كيف..مدري

    عاد هنا انا طلعت للدوام مع السواق وماشية مالي بالشيطان طاري مشغلة الاف ام على اساس محطة راديو تستمتع بها .. لكن وين المتعه هموبرامجهم البثرة

    اجلالرقيب ابو شرارة يهبهب في هالهليكوبتر فوق الرياض واخرتها يقول الزحمه كثيفه ..!!؟؟

    سبحان الله وش هالعلومه الجديده تصدق اهل الرياضماحسوا بهالزحمة .. طيب فرضنا انك تعلمهم عن الطرق المناسبة والفاضية انا شخصة منجدة وش دخلني في زحمة الرياض..؟

    نتعوذ من ابليس ونكمل الاستماع يالله يستاهلوناهل الرياض نشاركهم معنويا ووجدانيا في محنتهم اللي اكتشفها الرقيب ابو شرارة بعدجهد جهيد ومراقبة من هليكوبتر لو تعج غبار كان راحت في خرايطها


    بعد تقرير الكابتن طياريرجع المذيع البثر ويسولف على المستمعين ويذكرلهم اخبار مهمة .. منها خبر مهم ورائعقاله : ان سر الزواج السعيد في تايلند هو تفاحه كل يوم الزوج يسلم زوجته تفاحةوامورهم كلها تسهل بعدها

    يعني ماادري انا يعني يبينا نسوي نفسهم عاد هنا تخيلت عباس الصبح قايمن ويجي لمي ويعطيني تفاحة وابتسامته من جبال طويق لين شمر <<والله لارميها بوجهه وتنشب بخشمه

    وصلت الدوام <<طبعا مختلط..........
    وجلست على قرنبعي <<المكتب وفتحت الجهاز بخش النت نشوف جديد موكا عنان
    ومازالت ماصورة الموظفين تصب ذا داخل ويسلم وذا يرد السلام
    ويرزون خششهم على الشاشة ..ومانشوفهم الا اذا تهاوشت عصافير البطن<<يعني الظهر ووقت الغداء ونهاية الدوام
    والا اذا طلع يشفط له زقارة ......

    ماعدا موظف قرنبعه قدامي وهذا بثر من صميم القلب على مشارف الزواج وخاطب ومملك وياهو كرهني بابو الزواج كله وناشب للبنت والله رحمتها من قلب
    كل شوي رن رن ويشاورها على الاثاث والخ والا تمر على مسامعي غرفة المعيشة .........الله يالدنيا بدينا غرفة معيشة عقب بيت الطين والسعف ........ويمر اليوم وهو غزل xغزل <<والله حوم تسبدي حتى يقولها من كثر ماافكر بك حلمت اني راكب سيكل وانتي السيكل<<يالله بس

    ياشيخ اروح وطي اروح ملح اروح لغالغ اروح فلفل واحدتوه قالع ضرس على هالغزل اللي حسسني بانوثتي << هي تقولههههههههههههههههههه

    ولا اتركوا هذي فيه اطلق منها
    يوم اندمجت في بحيرة النت<<لا ياشيخة
    والمسن الاف المحادثات والضحك والفرفشة ....والشغل بوادي وانا بوادي

    الا ذا صوت ابو علاء

    يارب وش ذا قمت ارتعد بمكاني لدرجة الكرسي قام يرقص مصري
    واقوم واسكر بسررعة المواقع والدردشات والمسن وهنا المصيبة......علق الجهاز اللي حاطينه لي
    ويوم دنقت بفصل الفيش يطفي الجهاز
    الا يوم انعميت وارفع راسي وافتح الدرج واطلع نظارتي الشمسية واطالع قدامي الا هي صلعة ابو علاء واقف قدامي
    ((صلعته ذي عليها لمعة مو طبيعية كانك مغطسها بزيت وملصق على اطرافها قطن<<شعره مشيب ))
    ويصرخ ذيك الصرخة اللي طيحت قلبي بشوزي<<وانتم بكرامة
    وش تسوين لابارك الله باليوم اللي شفت فيه العلاقي الخضر حقك<<ملف التوظيف
    وانا اقوم وباحترام اقوله كنت بدخل لموقع العمل واطلع على اخر الاخبار <<الله من الكذب
    ويجي يقولي ذا شمس الدين استغليه هو اعمى موب عارفك وسكن بالحمام ذبحنا
    ياليت تشغلينه عن الحمام
    <<وانا هنا ارفع قلبي وارجعه مكانه واقول بقلبي ماشفت خير ياشميس
    واردد عليه تم تم ياابو علاء


    ولا اتركوا هذي بعدين فيه اطلق منها الحين

    بس هذي جملة سرية ومشفرةمايبي احد يستخدمها غيره .. لذلك سمعته وهو في السيب على اساس انه محرم لازم محديسمع .. قاعد يستظرف ويستخف دمه ويضحك وانا اشكانها تضحك مجاملة لانه يندرج تحتمسمى ( ابونا ) لازم نضحك على نكته ..

    جاني ذا الموظف البثر وش السوات يارفيقة العمل
    وانا اقوله وش سوات بايش
    قال
    تقولي خطيبتي بشوفك وانتي عارفة عندي فوبيا بنات خصوصا لو كانت حلوة احتمال يغمى علي قلت وهي وشتبي تشوفك الله يحوم تسبد العدو . وبعدين ورا ماشافتك وقت الشوفه توها تتذكر يوم تملكتوا وطاح الفاس بالراس ..


    رد علي ببثاره قائلا : لا شايفتني بس تبي تشوفني مرتن ثانية على اساس انه خلاص تعتبر زوجتي رسميا ..

    قلت : وانت الحين اربعوعشرين ساعه مزعج امها تلفونات وحالتك حاله ويوم تبي تشوفك تخاف وتبلش يخرب بيتكوين اللي يقولون الشباب ذئاب بشرية والله انت شكلك ذئب بشري ميد ان تايوان .. رحلشمس الدين يعلمك وش تسوي ..

    وهنا رجعنا لشمس الدين ..

    ( شمس الدين هذا هندي شغال عندنا بس انه متخلفجدا ومايشوف زين يعني لو اصرخ عليه من بعيد اقوله رح جب فطور مايدري من انا يحسبنيالمدير <<مدري يعني لهدرجة صوتي ولادي .. وغير كذا فيه مشكلة مزمنة اربع وعشرين ساعه في الحمام الله يكرمكم مدري وشيسوي وعشان كذا قالي المدير شوفيله صرفه اشغليه بها لاتخلينه .. عادبديت استغله انا يجيبلي فطور خاصتن ان الكافتيريا اللي عندنا اكلهم خايس .. ولااخليه يغسل سيارت سواقنا)

    بعد نهاية الدوام نرجع من نفس الطريق اللي جيتمعه انا والسواق ونفس الاذاعه الغبيه بس الحمدلله ابو شرارة يكون مسلم ورايح يتغدا ماهوب فاضيلزحمة السير


    بس مافيفكه من البثاره انا مايقهرني الا اذاعملوا استضافه لدكتور مثلا تخصص الامراضالصدريه .. طيب حلوا نستفيد من تجاوبة مع الاسألة لكن تجي هالمذيعه البثره وتقولناخذ فاصل اعلاني والفاصل عاد يتكون من اربع وثلاثين اغنية وخمس وستين اعلان متكرر .. جرير ليست مجرد مكتبة .. بالله ؟؟

    يعني مثلن مكتبه وأوني منزلية .. ولا مكتبه وحاطين لوحة على القزاز من برا كاتبين يوجد لدينا سباك متفرغ ... ولااعلان دجاج دو ونعم التربية بصوت الممثل اللي بطاش ماعرف اسمه مافيه غيره يسوياعلانات كل الاعلانات هو دايم الباقين الظاهر كلهم ماتوا او هاجروا؟؟

    نسيت اقولكم ان سيارت السواق مافيها كاسيت بس سيديوانا ماعرف انسخ سيديات لذلك مجبورة استمع للراديو لين اوصل للبيت واتغدا واغطلينومة لين يذن العصر

    ادري ان اهل الرياض مستغربين شلون تنام والناسماتوصل لبيتهم الا وهو يأذن العصر لكن لا ياحبايبي .. انا اوصل للبيت والساعه تشيرللواحده ظهرا يعني ماله داعي ابو شرارة عندناخخخخخخخخخخخ\

    اطلع العصر اروح لجدتي ..والعجايز عندها..... لين دخلت احس اني داخلة عيادة ولاده كنهم حوامل متسندين على المراكي والكرشة ممتدةوكل وحدة تذب على الثانية .. والله من الفضاوة هالعجز اذكر وحدة منهم كنا جالسينوتمر من فوق هليكوبتر حق الدفاع المدني قالت هالغرب ماخلوا شي ماخترعوهقامت ذي قالت أي فاضين

    هههههههههههههههههه ارحمينا ياللي ذابحة روحك منالشغل

    عاد جلستهم نبش فضايح ومستلمات ههههههههههههههه
    وعاد جاء جدي الكريم وقام هو وجدتي واخته العجوز يذبون بعض لين تسدحوا ضحك وارتفع ظغط جدي وطاح
    المهم رحت مع السواق اوديه للمستشفى وجلست السستر من ذولاصحاب الخشوم المفلطحه من شرق اسيا تكشف عليه وسبحان الله كنه مافيه شي يوم جتويناظرها قال : كم عمرك يا حلوه .. قالت عمري 42 ..
    مدري عاد تبي تفتك من هالشايب ولا صادزة لكن يومراحت ناظرني وقال اهب وجهها كنه شرابة مابين بها الكبر لا تجاعيد ولا غيره ..
    المهم بعد مارجعته مع السواق للمكتب تقريبا بعد العشا رحتللاستراحة يم خوياتي .. عاد اتذكر قبل فترة بسيطه كانت الجلسه تسوى الدنيا ومافيها . اما الحين ادخل وكأن على رؤوسهم الطير ولانفس يطلع من بعد ماكانت تسمع لجتهم منورا بغداد

    الحين كل واحدة منشبة وجهها في اللابتوب وفي هالنتبس ادخل سلام عليكم وعليكم السلام وتقوم وحدة منهم تصبلي فنجال قهوة ولا شاهي وترجعمكانها


    يابنات تعالواسولفوا عطونا علومكم ترد وحدة والله يا بسيم سواليفك وعلومك مليناها من يوم حنىبزارين وحنا نعرفك نبتل ؟؟ خلاص ياختي نبي شي جديد << رحمتوني صحههههههههه

    لين جت وحدة ثقيل دم .. وكئيبة وعصبية وبثرة ماتبي احد ولاحد يبيها .. بس مخلينهامعهم عشان تخف عنهم القطه



    يوم شفتها قمت وقلت يالله عن اذنكم الرجال موصينيعلى عشاء

    وسبحان الله مايبون يسولفون الا لاصار ماهو وقتهقالت وحدة منهم : بلا نصب انتي منتي متزوجة .. قلت يبنت الحلال متعلمة طبخ وبطبخ لابوي بس فكينا خلينانمشي واقول في قلبي : جت وجه البومة ماوالله اقعد

    واطلع منهم واهيم على وجهي في هالشوارع انا وجعفر <<سواقي لبى قلبه ......مدري وش اسويومدري وين اروح وطفشانة وكل شي جا على بالي هالعالم اللي هابين في الحب والحزن كلمادخلت الماسنجر القا هالتوبيكات .. جرحي كبير وحزني اكبر واحبك موت لاتخليني وحزينوغدربي الزمن وهلم جرا هههههههههههه


    مادري هالشعب يحب باليوم الف مره ويطفش عشرين .. المشكله لو تساله وشمطفشك يقول مدري ولا شلون حبيت ومن حبيت يقول ماحب بس كذا كاتب....
    تذكرت حكة الرسام عبدالسلام الهليل يوم يقولالفراغ دمار للعقل ..


    ودي يعني اغير الروتين مثلا اتزلج في جليد سيبريا ولا اناطط في خضرةفيينا وشلالاتها ولا اجري في جبال الالب ولا اركض بين الزهور في قلايع ودرين المهماني اسوي شي غير


    مليتمن الكشتات في الغضا طلعت ريحة الغضا مع عيوني .. محمد عبده يقول اتقلب على جمرالغضا انا موب بس تقلبت انا سويت سبلكس خلفي على جمر الغضا خلاص يكفي حوادث يكفيموت << ورى ماتطسين

    رجعت للبيت اتعشا وانام وغدا نبدا يوم جديد بالعدد ولكن ليس بالسيناريو لانه تقريباواحتمال كبير انه يكون نفس النظام وياقلب لاتحزن




    ......


    مره قريت خبر عنوانه ( قاتل صامت يفتك بصاحبه ) .. يقصدونالروتين


    وبعدينقالوا كسر الروتين والتغيير يخلصكم من الشعور بالوحدة .. لذلك تخلص من الوحده وغيرالروتين ولكن لاتتحمس بقوة لايطق بك عرق ولا شي لانه قلت مره قلت مراهيف وش رايكنغير الروتين قالت وش نسوي يعني نصطوا على مصرف
    << ياشين اللي تكثرافلام

    الزبدة من الخربطة
    الملل ذبحنا والله والروتين اعدمنا


    ذاوالسلام خير ختااام


    ودي

    ولاتنسون رايكم بخربطتي الغبية اللي اثارها الملل والطفش
    avatar
    رزونه المزيونه
    مشرفة نافذة السيآحه
    مشرفة نافذة السيآحه

    عدد المساهمات : 1038
    تاريخ التسجيل : 31/10/2009
    الموقع : باليابــان 3>

    رد: صلصة ...تونة....حليب....دقيق....ماء...بيض=مكرونة بشمل والسيناريو واحد

    مُساهمة من طرف رزونه المزيونه في السبت نوفمبر 13, 2010 9:16 am

    يــوه الموضوع طويل بس حلو

    لكن سالفة العجايز خطيره من جد فاضيات :و2:

    يعطيك الف عافيه مربطة الجن :ق2:

      الوقت/التاريخ الآن هو السبت يونيو 23, 2018 3:16 am